𝐌𝐚𝐝𝐚𝐱𝐰𝐞𝐲𝐧𝐚𝐡𝐚 𝐉𝐚𝐦𝐡𝐮𝐮𝐫𝐢𝐲𝐚𝐝𝐝𝐚 𝐒𝐨𝐦𝐚𝐥𝐢𝐥𝐚𝐧𝐝 𝐨𝐨 𝐇𝐚𝐝𝐲𝐚𝐝𝐨 𝐐𝐚𝐚𝐥𝐢 𝐚𝐡 𝐠𝐮𝐝𝐝𝐨𝐨𝐧𝐬𝐢𝐢𝐲𝐞𝐲 𝐀𝐫𝐝𝐚𝐲𝐝𝐢𝐢 𝐤𝐚𝐚𝐥𝐦𝐚𝐡𝐚 𝐬𝐚𝐫𝐞 𝐤𝐚 𝐠𝐚𝐬𝐡𝐚𝐲 𝐓𝐚𝐫𝐭𝐚𝐧𝐤𝐚 𝐐𝐮𝐫’𝐚𝐚𝐧𝐤𝐚 𝐊𝐚𝐫𝐢𝐢𝐦𝐤𝐚 𝐚𝐡 𝐞𝐞 𝐁𝐢𝐬𝐡𝐚 𝐑𝐚𝐦𝐚𝐝𝐚𝐚𝐧.

Madaxweynaha Jamhuuriyadda Somaliland, Mudane Cabdiraxmaan Maxamed Cabdillaahi (Cirro), ayaa abaal-marimmo kala duwan oo qaali ah guddoonsiiyey Ardaydii Kaalmaha Sare ka gashay tartanka Qur’aanka Kariimka ah ee Madaxweynaha ee bisha Barakaysan ee Ramadaan oo la soo gebo gabeeyey.

Munaasibadda Abaalmarinta Tartanka Madaxweynaha ee Bisha Ramadaan oo ay ku tartamaan Da’yarta Xufaadda ah ee ka kala socota Gobollada dalka ee Wiilasha iyo Hablaha oo uu Madaxweynuhu ku soo kordhiyey ayaa ka qabsoontay Qasriga Madaxtooyada JSL waxana Madaxweynaha kala qayb galay Madaxda Wasaaradda Diinta iyo Awqaafta JSL, xubno ka mid ah Culimada dalka iyo qaar kamid ah macallimiintii ardaydan ku soo tacabtay.

Kaalinta koowaad ee tartanka Qur’aanka Kariimka ah ee wiilasha waxa ku guulaystay Cabdilaahi Jaamac Saalax, oo ka socday Gobolka Sanaag, waxana uu Madaxweynuhu guddoonsiiyey Gaadhi cusub oo uu mulkiyaddiisa yeelanayo, halka Xamse Cabdiraxmaan Saalax oo ka socday Gobolka Maroodi-jeex uu ku guulaystay kaalinta labaad, iyo Cabdirisaaq Axmed Jaamac oo ka socday Gobolka Togdheer oo ku guulaystay kaalinta saddexaad uu la guddoonsiiyey hadiyado kala duwan oo ay ku mutaysteen kaalmaha sare ee ay ka galeen Tartanka Qur’aanka ee ay galeen.

Dhinaca kale, waxa uu Madaxweyne Cabdiraxmaan Maxamed Cabdilaahi (Cirro) sannadkii labaad oo xidhiidh ah uu Abaalmarimmo qaali ah guddoonsiiyey saddexdii hablood ee ugu sarreeyey Tartanka Qur’aanka Kariimka ah ee Hawlaha khaaska u ah, waxana kaalinta koowaad gashay Rayaan Xuseen Axmed oo ka socotay Gobolka Awdal waxaana gacanta laga saaray abaal marin Dahab ah, halka Caasha Aadan Ducaale oo ka socotay Gobolka Maroodi-jeex ay kaalinta labaad ku guulaysatay iyo Bushra Cabdi Cali oo ka socotay gobolka Awdal, kaalinta saddexaadna ku guulaystay la guddoonsiiyey Abaal-marinno qaali ah oo kala duwan oo ay aad ugu farxeen.

Ugu dambayntii, Madaxweynuhu waxa uu Cumro dhammaystiran ku abaal mariyey maamulayaashii gacanta ku hayey Ardaygii kaalinta koowaad ka galay Tartanka Qur’aanka Kariimka ah ee Wiilasha iyo Ardayaddii kaalinta koowaad u gashay tartanka qaybtiisa Hawlaha.

𝐀𝐋𝐋𝐀𝐀 𝐌𝐀𝐇𝐀𝐃 𝐋𝐄𝐇 𝐗𝐮𝐬𝐞𝐞𝐧 𝐀𝐚𝐝𝐚𝐧 𝐂𝐢𝐠𝐞 (𝐃𝐞𝐲𝐫),𝐀𝐟𝐡𝐚𝐲𝐞𝐞𝐧𝐤𝐚 𝐌𝐚𝐝𝐚𝐱𝐰𝐞𝐲𝐧𝐚𝐡𝐚 𝐉𝐚𝐦𝐡𝐮𝐮𝐫𝐢𝐲𝐚𝐝𝐝𝐚 𝐒𝐨𝐦𝐚𝐥𝐢𝐥𝐚𝐧𝐝