Hargeysa-Warbaahinta caalamiga ah ee The Land of Origins, ayaa daabacday warbixin si qoto dheer uga hadlaysay arrinta aqoonsiga Somaliland, iyada oo si gaar ah u fallanqaysay tallaabadii taariikhiga ahayd ee Israa’iil ay qaaday 26-kii Diseembar 2025.
Warbixintu waxay tibaaxday in aqoonsiga Israa’iil uu muujinayo jidka dhabta ah ee aqoonsiga dawladuhu u bilowdo, maadaama hal dal marka uu tallaabada qaado ay kuwa kalena si tartiib ah u raacaan.
Warbixintu waxay ictiraafka Somaliland ka heshay Israa’iil ku sifaysay mid istaraatiiji ah oo farriin culus u diraya beesha caalamka, isla markaana bilow u ah isbeddel diblomaasiyaddeed oo ballaadhan.
Sida lagu xusay warbixintaas uu qoray The Look and of Origins tallaabadan ayaa keeni karta in dalal badan ay dib u eegaan mowqifkooda ku wajahan Somaliland, islamarkaana ay bilaabaan inay ku daydaan go’aankii ay Israa’iil qaaday.
Warsiduhu waxa kaloo uu iftiimiyay in aqoonsiga Somaliland uu si toos ah ula xidhiidho amniga Badda Cas, marin-ganacsiyeedka caalamiga ah iyo muhiimadda istaraatiijiyeed ee Geeska Afrika. Warbixintu waxay hoosta ka xarriiqday in aqoonsigu yahay geeddi-socod dheer oo u baahan qorsheyn, dulqaad iyo hoggaan go’aan adag leh, balse Somaliland ay leedahay awood iyo fursad ay ku gaadhi karto himiladeeda.
Gebogebadii, warbixintu waxay xustay in aqoonsiga Israa’iil uu Somaliland u furayo albaabo cusub oo dhinacyada diblomaasiyadda, amniga iyo iskaashiga caalamiga ah ah, isla markaana ay suurto-gal noqonayso in qalinka ay ku wada duugaan heshiisyo difaac iyo iskaashi.